Lunäio zeneise da sciâ Tägnâ

Conseggi pe l’òrto

Into ritmo de saxoin, a tæra ligure a conta de stöie de paçiensa e saviessa antiga. Tra e fasce ch’ammian in sciô mâ e i òrti repiggiæ da-i bricchi, e moen di nòstri besavi an trasmisso de preçiose conoscense, con adattâ de tecniche de cortivaçion a-a particolare geografia da nòstra region.

Sta seçion a l’arrecheugge meise pe meise i conseggi pe l’òrto, apreuvo a-o lunäio naturale ch’o l’à delongo guiddou o travaggio de quelli che cortivan in Liguria. Da-o baxaicò ch’o profumma e stæ ligure a-e ardiciòcche agoggiæ d’Arbenga, da-i succhin a-e patatte quaranteñe, tutte e ciante an o seu momento ideale pe ëse semenæ e arrecuggeite.

Che t’aggi un poggiölo piccin in çittæ ò un terren grande inte l’entrotæra, sti conseggi chì te tegnian compagnia tutto l’anno e t’aggiuttian à avei un òrto pe in davei ligure.

Compoxiçion da tæra

Eive chì quarche conseggio pe capî a compoxiçion da nòstra tæra. Gh’é de ciante che porriëscimo ciammâ «mostratoe», perché mostran a prevalensa de un o ciù elementi inte un terren.

In sciô semenâ

Un conseggio pe semenâ ben. A tæra l’é megio bagnâla ben sotta, che se â bagnemmo de d’ato, se e armelle son picciñe, se spantegan da tutte e parte. S’inandia a tæra sccianandola ma sensa sciaccâla tròppo, se bagna ben, se dispoñe e semense distansiæ à segonda da grandessa da cianta (exempio: ascì se en picciñe, e armelle de carottoa van distansiæ de trei ò quattro citti) dapeu se ghe spampaggia un seu no tròppo druo de tæra de d’ato; o dev’ëse no ciù erto do doggio de l’armella.

Se creddei a-e luñe: luña calante, se semeña pe cheugge e ciante che se ghe mangia e feugge; e de luña crescente se semeña tutte e atre.

Conseggi pe tutti i meixi

Zenâ

À zenâ inte l’òrto no gh’è guæi da fâ. Saieva o caxo de dâ unn’euggiâ à sappe e atri attressi pe fâ un pittin de manutençion, comme levâ à ruzze, onze i maneghi con euio de lin e affiâ pennacchi e-e messoiette. No saieiva mâ açende ascì mötosappe e taggiacosti (tutto quello ch’o va à motô) pe vedde se fonçioñan, magara cangiâ quarche tòcco e accattâ e candeie pe aveighele a-a man. Controllâ e condiçioin de grasciue e pue pe-i trattamenti e mette in ordine e semense che emmo fæto ò accattou l’anno passou. Pe chi gh’à ascì erboi de mei e pei, se peuan poâ, ma visto che e saxoin son delongo ciù cade, besorrieva piggiâ o momento ciù freido de l’inverno pe fâ patî e ciante o meno che se peu. Se ei tegnuo de patatte da semensa, o l’é o momento de fâle buttâ, mettendoe vexin a-o barcon da cantiña descoverte. Ma se a cortivaçion a l’é stæta fæta sott’a-i 800 metri, no gh’é conveniensa (sott’a-i 800m e patatte patiscian de moutie fonziñe), e l’é megio accattâle neue. Se gh’ei unna særa ò unna pascionea, poei semenâ leituga, spinasci, cöi, pöri. Se ei semenou d’ötunno e a cortivaçion a l’é cresciua tanto pe-o tròppo cado anormale, controllæ e temperatue de neutte e tegnî a-a man di feuggi de tesciuo no tesciuo pe-a covertua.

Frevâ

Frevâ o l’é o momento pe inandiâ a tæra. Se no l’ei fæto primma de l’inverno, mettei a grasciua. Saieva megio però aveilo za fæto a-o seu momento. Inandiæ i sentê che servian in mezo a-i sorchi, devan ëse fæti in mòddo de no bruttase tròppo co-a bratta; se peu deuviâ vege ciappe rotte, prie, moin. Taggiæ l’erba in gio à l’òrto e arregordæve de tegnîla bassa, che s’a va in semensa ve impe i sorchi. No rancæla via, l’òrto o gh’avià ciù pöca sæ.

I vegi divan: «se ti veu un bello aggiâ metti l’aggio de frevâ». Defæti o l’é o momento de ciantâ inta tæra e bulbacee: çioule giane, aggio, scialòtte, pöri d’ötunno. Dapeu poïsci, giæe, spinasso. Inta særa poemmo semenâ: caròttoe tempoie, çioule gianche, pöri, leituga, radiccion, scaròlla, porsemmo. Primma che i erboi da fruta vaggan in sugo, fæ e poatue; l’é ascì l’oa de traciantâ i erboetti neui. Poæ e reuse. Se gh’ei de cioende de mortin che en tròppo vege o l’é o momento de dâghe recatto e renoelâle.

Marso

Marso o l’é o momento giusto pe-a prevençion de moutie fonziñe inti erboi da fruta: beseugna fâ di trattamenti co-o rammo e o sorfo. Dæto che inte questo meise l’é façile che ghe segge tanta differensa de temperatua tra o giorno e a neutte, e parte de scòrse di erboi espòste a-o sô peuan patî de scciappeuie. Pe schivâ o problema se peu spennellâ a scòrsa di erboi con quarcösa de ciæo. I nòstri vegi ghe davan a cäçiña, ma se peu addeuviâ atre preparaçioin appöxite. Momento bon ascì pe fâ i innesti à taggio. Semenæ in tæra leitughe, spinasci, giæe, radiccioin e scaròlle ma co-e proteçioin de tesciuo no tesciuo pe-a neutte. Se peuan mette inta tæra e patatte çernue tra e qualitæ ciù adattæ a-e vòstre bande. Se gh’ei do spaçio a-o sosto, preparæ di vasetti e semenæ succhin, sucche, meizañe, tomate, pevioin, pevionetti, chigheumai, faxolin, çellao, porsemmo, e baxaicò. Chi gh’à o vin da imbottiggiâ peu fâlo da-a meitæ do meise scin a-a fin.

Se ghe creddei, poei ammiâ e luñe: primmo quarto, vin ch’o frizze; luña piña e urtimo quarto de marso, tutto o vin. Segondo a convinçion no se deve imbottiggiâ de luña neua.

Arvî

Arvî o l’é o meise bon pe semenâ quæxi tutto: leitughe, radiccioin, giæe, faxolin gancetti e faxolin pellandroin, faxeu e faxoæle, poïsci, ravanetti e rave, spinasci, cöi de stæ, çeixai, granon doçe. Con sæximo e delicatessa se peu traciantâ e ciantiñe de succhin, pateche, meizañe, pevioin, tomate, çellai. E tomate l’é megio incarassâle a-a primma. Dòppo a meitæ do meise se peu semenâ: boraxe, porsemmo, persa. Se gh’ei do terren da inricchî in mainea naturale, se peu semenâlo con erba mega, treifeuggio gianco e rosso, senapa sarvæga (ma no se dapeu ghe voei semenâ di cöi). Poei ascì guägnâ do fæto d’avei ciantou e bazzañe: dòppo a recuggeita de tutte e teighe no stæ à rancâle ma taggiæle a-o còllo e lasciæ e reixe into terren e o verde in çimma à seccâ. Quande saià o momento de semenâ, interræ o tutto e o terren o gh’avià unna bella scòrta de azöto. Inte sto meise comensa à sciortî pigheuggi, mosche da fruta, parpaggieue e parpellette parascite. Beseugna fâ di trattamenti contra e bestiete e, scicomme «à arvî cioî cioî», ascì fâ prevençion pe-e moutie fonziñe. Se e ciante de patatte en vegnue erte abasta, beseugna recavâle. Ammiæ che no ghe segge za euve e bäbòlli de dorifora: e euve en giäne e i bäbòlli en reusa con de maccette neigre. Mi ê levava à man, anche perché tutti i produti che en in vendia son ben ben teusceghi e no guæi de boña reisa.

Mazzo

Mazzo o l’é un meise de gran travaggio. Se peu anâ avanti à traciantâ, e fâ i trattamenti a-i erboi da fruta. Beseugna incarassâ tutte e ciante che ghe n’an de beseugno, controllâ tutti i giorni e patatte e quande gh’é unna cianta rosiggiâ ammiâghe da arente: ghe saian seguo di atri bäbòlli da levâ. Beseugna levâ l’erba drento di sorchi e taggiâ primma ch’a vagghe in semensa quella inti bòrdi e inte ziñe. Fâ e segonde semene de insalatte da taggio, semenâ o baxaicò e o porsemmo, levâ i «bastardi» a-e tomate, meizañe e pevioin e ligâ e ciante de maniman che crescian. D’ògni tanto dâ o rammo e o sorfo a-e ciante che n’avessan de beseugno e bagnâ con costansa i sorchi e e preuxe. No se peu mancâ un giorno da chì a-a fin da estæ, un pö pe l’erba, un pö perché e ciante n’aggian sæ, e dapeu pe tegnî d’euggio i parasciti.

Se creddei a-e luñe, se peu imbottiggiâ de luña neua.

Zugno

De zugno, i travaggi en ciù o meno i mæximi de mazzo. Se gh’ei di erboi da fruta che ei poou quande l’ea o momento, peu ëse che ghe segge cresciuo di «bastardi», saiva à dî quelle ramme che van sciù drite in mezo a-e atre ramme. Saieivan da taggiâ, perché sussan o sugo da cianta e s’impan de feugge che fan ombra a-e frute no faxendole meuiâ. Diggo saieivan, perché se e ramme çernue into momento da poatua fïsan seccæ ò ammoutie, se piggia un susson de proscimitæ, o ô se cega à l’infeua, se taggia i maròtti e o ô se fa vegnî unna ramma da fruta. Inte sto meise beseugna ëse torna de boña voentæ: se sappa, se recava, se leva i bastardi da-e tomate, se dà a mente a-e carasse e inti sorchi se fâ de mòddo che no ghe segge erba drento, se taggia l’erba in gio ch’a no vagghe in semensa e se fa ascì quarche semenaggion neua de insalatte, se cianta cöi, faxeu, fenoggi, faxolin, ravanetti, rave e se tracianta ascì i gardi e quarche gamba de tomata pe unna produçion tardia.

In scê erbe e e scioe boñe da mangiâ. Inte sta saxon se cheugge e erbe sarvæghe e e scioe boñe da mangiâ. O coscì dito preboggion (mescciua de erbe sarvæghe da boggî) o l’é despægio da zöna à zöna, ascì perché ognidun o gh’à i seu gusti e e seu tradiçioin. Quæxi tutti, però, into masso ghe mettan: borraxa (Borrago officinalis), scixerboa (Sonchus oleraceus), giæa sarvæga (Beta vulgaris), oege de crava (Plantago coronopus), erba nerviña (Plantago lanceolata), dente de can ò sciuscion (Taraxacum officinale), erba de vacche (Valeriana rubra), pimpinella (Sanguisorba minor), radiccion (Cichorium intybus), ortiga (Urtica dioica). Scioisce a gazzia e o sambrugo co-i quæ se peu fâ di boniscimi frisceu.

Luggio

Gh’é tanta luxe e e nostre insalatte peuan anâ in semensa, mascime e leitughe che en e ciù senscibile a-o sô. Se cheugge e erbe da fâ seccâ, con bon tempo e tòsto scioie. Se seccan a l’ombra inte un pòsto ventilou ma cado. Se ei traciantou do sellao, beseugna recavâlo pe fâlo ingianchî. Se o porsemmo o no l’é vegnuo ben, se peu semenâlo inte sto meise ascì, ançi fòscia o vëgne sciù ciù fito e megio. M’arrecommando de dâ a mente a-e patatte, che a dorifora a no dà schiffio. Tegnî a tæra bagnâ ma sensa che l’umeo o tocche e feugge e i fruti e no fæ passâ tròppo tra unna bagnâ e l’atra, che e ciante patiscian i cangiamenti bruschi. Peu ëse neçessäio inricchî o terren, mascime donde gh’é e ciante che consumman de ciù e fâ di trattamenti pe-e moutie fonziñe à tomate, pevioin, succhin, sucche, meizañe, etc., e à sto ponto saieva megio çimmâle pe fâ meuiâ megio a produçion. I cöi peuan patî l’invaxon de parpaggeue do cöo e da mosca do cöo: lì ascì beusegna fâ di interventi.

Agosto

In agosto se cheugge. L’é o momento che i fruti meuian de ciù. Ascì e patatte avian finio o seu tempo e o verde o secca. Quande o l’é tutto seccou ben, se prinçipia l’arrecheuggeita. Tegnî conto d’anâghe cianin co-a sappa pe no arroinâle e çercæ de cheuggile tutte, che maniman quelle ch’arrestan peuan transmette quarche magagna a-e proscime coltivaçioin. Se devan lasciâ à sciugâ in sciô terren un pâ de giorni primma d’arreccoviâle inte unna cantiña a-o scuo. O mæximo travaggio o se fa co-e çioule e l’aggio, se lascian feua da tæra à sciugâ primma de intressâle pe fâ e reste. Se i faxeu, faxoele e faxolin an finio o seu tempo, se peuan taggiâ incangio de rancâle, defæti e reixe di legummi inricchiscian o terren de azöto. Se porrieivan interrâ ascì e parte verde, ma solo se no son moute. M’arrecommando, o terren delongo bagnou! In agosto o sô o picca e o se sciuga fito. Se quarchedun o gh’à a poscibilitæ, o porrieiva fâse un impianto pe bagnâ à stisse, l’é o megio: no se straggia ægua e e ciante beivan quello che ghe serve. Chi o l’à ciantou i cöoscioî, pe avvardâli da-o tròppo sô ch’o î fa vegnî marròn-giani, o peu ligâ insemme e primme quattro/çinque feugge de mainea de no fâghe piggiâ a luxe diretta. Se deve crovî ascì i fenoggi piccin pe fâli ingianchî. Arræî e ciante tròppo scciasse.

Settembre

O l’é un meise de tranxito verso l’ötunno. Ma se peu ancon semenâ spinasci, insalatte da taggio e ascì o sarzetto. Se semeña ascì e rave in righinagge distante eutto/dexe citti uña da l’atra. In primmaveia se mangian e feugge tenee e quande scioian se mangian ascì e scioe (çimme de rava). O l’é ascì o tempo de ingianchî o sellao e i gardi. Inte ciante de tomata se ghe leva e urtime scioe, che tomate no ne vegnan ciù, e se o freido o l’arriva fito se piggia cianta e tutto e â se mette appeisa, reixe in sciù, inte unna cantiña, che e tomate meuian a-o scuo. Se i bertoeli no en vegnui grendi abasta, se peu çimmâ e ponte. Se cheuggian quande en belli serræ e grendi a-o manco comme unna noxe. Donde gh’é ciù freido beseugna mette à l’assosto e ciante ciù delicæ. Magara con un tesciuo no tesciuo. Saià o momento de cheugge e sucche, che se piggian quande a cianta a l’é giana e o pegollo o se destacca sensa sfòrso, quæxi da solo. L’é ascì a saxon d’areccheuggeita di fruti domesteghi e sarvæghi. Meuian e fighe, noxe, («Pe-a Santa Croxe o bacco a-a noxe»; a Santa Croxe a cazze a-i 14 de settembre) meigranæ, e çerti pei e mei. Se gh’ei tanta (ma tanta!) paçiensa poei fâ a confittua de grattacû che se cheuggian quande en un pittin arrappæ. Dapeu gh’é o sambrugo e e moie.

Ottobre

O l’é o meise de-e urtime arrecheuggeite e da proteçion de-e cortivaçioin Öutunnali. De maniman che se libera do terren beseugna preparalo pe a proscima primmaveia. Sappetæ a tæra e spampaggiæ o liamme o atro conçimme a lento relascio. Mi preferiscio i conçimmi naturali che tegnan a tæra viva perché se fan aggiuttâ da i batteri e da- lombrighi. Ma se un o veu addeuttâ atre conçimaçioin, o mæ conseggio o l’é che o fasse primma unn’analixi chimica do terren pe addeuviâ e giuste quantitæ. Se stæ inte un pòsto donde no neva, saieva o caxo de fâ unna crovitua ben ben scciassa, con feugge, erba (sensa armelle) fen e – pe avvardâla da-o sciusciâ di venti – mettighe in çimma ramme e prie. Veddiæ che quande in primmaveia â leviæ de d’ato, sotta o terren o saià bello sciòcco e neigro. Inte sto meise, se semmo inte un pòsto no guæi freido, se peu semenâ e bazzañe, sedonca l’é megio spëtâ a primmaveia. Ascì i poïsci e i çeixai, ma no vexin, che no se «veuan ben». Se ei de çioule e pöri da inverno da traciantâ, o l’é o momento bon. Se st’estæ ei taggiou o radiccion, no arrancæ e reixe, che in primmaveia sciortian feua i costetti. A-i cöi gaggetta (Brassica oleracea var. sabauda), cöi garbuxi (Brassica oleracea var. capitata) e cöi neigri ghe piaxe o freido, ançi, o zeo; vëgnan ciù croccanti e savoii. L’é o momento de cheugge e varietæ tardie de brigne. Se ve piaxe, se peuan reccheugge ascì i brigneu che s’adeuvian pe insavoî a rappa ò pe fâ un licô doçe.

Novembre

Semmo quæxi d’inverno, ma inte l’òrto quarcösa da fâ gh’é delongo. Pe primma cösa, se gh’ei di erboi da fruta besorrieiva sappettâghe d’in gio e mettighe da grasciua ben meuia e à lento relascio. Spennellæ e scòrse co-a «pasta pe i teu» ò cäçiña, ma primma dæghe unn’euggiâ che no ghe segge di parasciti (into caxo, azzonzeighe un trattamento). St’intervento o serve da proteçioin contr’a-e scciappatue do zeo. A-o conträio do nostro proverbio ch’o dixe che «chi veu un bello aggiâ o ciante l’aggio de frevâ», se dixe che ascì inti pòsti ciù freidi se se cianta l’aggio de sta saxon, e teste vëgnan ciù grosse. Mi no l’ò mai fæto, ma se peu fâ un esperimento, na? Un conseggio pe quelli che gh’an o terren peson e pin de tæra d’euggio: dæto che in primmaveia o tende à arrestâ tròppo bagnou e e semense giamiñan à beuttâ, se peu fâ a coscidita semenaggion zeâ. O terren o dev’ëse sciuto e un pittin zeou, se çerne de semense tempoie – ançi, tempoïscime – che van coverte con tæra (ninte torba) e d’inverno devan solo insciâ e no beuttâ. In primmaveia beuttian ancon ciù fito che se vagghe inte l’òrto. E semense an da ëse de varietæ rescistente a-e zeæ comme caròttoe, spinasci, ravanetti, insalatte varie.

Dexembre

À dixembre comme pe zenâ inte l’òrto no gh’é quæxi ninte da fâ. Se gh’avei de giusterne e di bolacchi pe l’ægua, sveuæli, magara no do tutto, pe no fâli scciappâ da-o zeo. Fæ o mæximo co-e cannæ e metteile à l’assosto. Se ve ascädæ co-a stiva, mettei da parte a çenie de legna ch’a l’é unna grasciua potascica ch’a gusta tantiscimo à patatte, tomate, sellao, cöoscioî, framboase, e reuse. Çinquanta/çento grammi pe m³ en assæ. In sciâ fin do meise, se peu comensâ à semenâ quarcösa inta særa e se peu ascì anâ avanti co-a semenaggion «à terreren zeou», comme à novembre. Inte sto meise e ascì ciù in là, sccioisce l’armon (Arbutus unedo), un erboetto/costo che into mæximo momento o meuia i fruti. Co-i armoin se ghe peu fâ de confittue e dà gusto a-e rappe.