Lunäio zeneise da sciâ Tägnâ

E squaddre da Liguria

O cheu sportivo da Liguria o batte fòrte, tra i campi pin de pua de l’introtæra e i stadi de çittæ, da-e pisciñe a-e mæñe. Derê à ògni mariölo colorou gh’é unna stöia de communitæ, tradiçion e pascion ch’a definisce l’identitæ di nòstri territöi.

Inte sta seçion s’attreuva e stöie de squaddre ligure, da-e ciù avvoxæ a-e ciù picciñe de provinsa, che representan con orgheuggio a nòstra region inte tante discipriñe. Da-o ballon a-o waterpölo, da-o basket a-o ballonetto, sta seçion a mostra e squaddre ch’an contribuio à scrive de pagine importante inta stöia do spòrt ligure.

ANPI Casassa

L’A.S.D. ANPI SPORT Emilio Casassa, ciammâ da tutti ANPI Casassa, a l’é nasciua do 1953 graçie à un gruppo de partigen da Vallâ do Besagno. A squaddra a l’à reçevuo do mazzo do 2015 a medaggia d’öo a-o merito sportivo. L’ANPI Casassa a zeuga into campo «25 Aprile» de Zena co-o caratteristico cô rosso da seu maggia. O nomme o l’é unna dedica a-o zoveno partigian Emilio Casassa ch’o l’aveiva perso a vitta in scî monti da Vallâ da Trebbia. A squaddra a l’é arrestâ tòsto delongo inte categorie di amatoî ma a l’à guägno o campionato de primma categoria da saxon 1972-1973.

Arbenga

L’Union Sportiva Albenga, a l’à da ëse mensunâ mascime pe-o fæto ch’a l’é scentâ into mezo do campionato do 2025, à caxon de fæti pöco ciæi e con tutto che a squaddra l’anno avanti a l’aiva guägno l’intrâ a-a Serie D. A stöia da squaddra a l’é ben ben antiga ascì, con un stadio de grande capaçitæ, o «Annibale Riva», donca o nòstro öguio l’é pe sta squaddra de formâse torna e poei tornâ a-e categorie di urtimi anni.

Caireise

Sta squaddra a no l’é avvoxâ pe avei guägnou di titoli ò pe un motivo particolare ma a l’é un exempio da pascion pe-o ballon do Ponente ligure: l’A.S.D. Caireise 1919 a l’à avuo l’önô de militâ inta serie profescionale da C2 inta saxon 1985-1986. Dòppo sto successo a squaddra a l’à gallezzou delongo tra e categorie di amatoî. I giano-bleu zeugan into staddio «Cesare Brin», battezzou in nomme do proprietäio ciù importante da stöia da soçietæ. A Caireise a l’à guägno l’intrâ inta Serie D do 2024, inta speransa de vedde un trend poxitivo pe-i pròscimi anni.

Entella

L’Entella, a squaddra a ciù importante do Tigullio, avversäia da Lavagneise e do Sestri Levante, con un campionato de Serie C, un de Lega Pro e quattro de Serie D, a l’é delongo stæta unna squaddra boña de batte squaddre ben ciù valente in sciô papê comme o Zena. Co-i coî gianco-bleuçê, l’Entella Chiavari a zeuga into staddio communale de Ciavai e a l’é apreuvo à fâ retorno inta Serie B, con mostrâ a grande ambiçion di diäi neigri de voei compete inte divixoin ciù erte. Lezzendäia a l’é stæta a seu primma remonta inte categorie ciù erte partindo da-a seu refondaçion do 2002 sotta o nomme Unione Sportiva Valle Sturla Entella, con l’arrivo inta Serie B do 2014.

Impëia

I draghi d’Impëia piggian l’ereditæ de l’Union Sportiva Impëia fondâ do 1923 e de tante atre soçietæ che, dòppo sta chì, an piggiou o nomme da çittæ inti anni: A.S. Imperia ’87, A.S.D. Imperia Calcio, Pro Imperia, etc. Pe di anni a l’à dovuo scompartîse a provinsa co-a Vintimiggeise e a Sanremmeise, patindo retroçescioin e vegnindo refondâ træ vòtte. Sciben e difficortæ, l’Impëia o vanta ben quattro Coppe Italia Dilettante da Liguria, e trei campionati de Serie D. L’A.S.D. Impëia o zeuga into stadio Ciccione co-i coî neigro-bleu.

Pro Recco

Sta squaddra de waterpölo a l’é a ciù titolâ a-o mondo; a Pro Recco Waterpolo 1313, ciammâ da tutti Pro Recco, a peu vantâ un gran numero de titoli: 36 scui, 17 Coppe Italia, 11 Champions League, 9 Supercòppe… I gianco-bleu mantëgnan a tradiçion de tante squaddre ligure da-i coî gianco e bleuçê, e zeugan inta pisciña do commun de Söi.

Saña

O Saña o l’é caratterizzou da unna stöia ch’a parte da-a mascima serie italiaña di anni dexe do neuveçento (a Primma Categoria) fin à restâ bloccou tra tanti fallimenti inte parte erte de categorie di amatoî (a Primma Categoria do giorno d’ancheu). I striscioin – diti ascì i gianco-bleu – zeugan into stadio Bäçigalô (ciammou coscì in önô do portê Valerio Bacigalupo, zugou do Saña e do grande Turin) e o l’é anæto apreuvo a-o destin da seu squaddra: into corso di anni, o s’é reduto de capaçitæ da-e 20000 a-e 4000 persoñe. Sciben e seu mille fadighe, o «Vegio drafin» o vanta unna stöia de ciù longhe, e unna Coppa Italia Dilettanti do 1991.

Sandöia

Sta squaddra a no l’à beseugno de presentaçion: l’Union Calcistica Sandöia, titolâ de un scuo, quattro Coppe Italia, unna Supercoppa Italiaña, unna Coppa de Coppe UEFA e un campionato de Serie B, a l’é fòscia a squaddra de ballon moderna ciù importante da Liguria. I seu coî caratteristichi en dovui da l’union (da chì o titolo) da Sampedæñeise (çerciâ de rossoneigro) e da Andrea Döia (gianco-bleu), de donde o nomme i bleuçerciæ. Lezzendäia a l’é stæta a squaddra do mister Vujadin Boškov, a quæ a l’à guägnou a UEFA do 1990, o Scuo do 1991, e a Supercoppa do mæximo anno à Zena. A squaddra a zeuga into Ferraris, o stadio do quartê de Marasci, avvoxou in tutto o mondo. E difficortæ di urtimi anni no mettan in ombra e conquiste da squaddra di seu tempi d’öo.

San Leonardo

Sta squaddra a l’é avvoxâ pe unn’atra qualitæ de ballon: primma che o football o piggesse o nomme che tutti conoscemmo, un atro zeugo ch’o vanta de origine ben ben ciù antighe o l’ea conosciuo co-o mæximo nomme, ò ascì «ballonetto» (in italian pallapugno). O ballon o l’é un zeugo pratticou pe-o ciù in Piemonte e inta Liguria de Ponente e a A.S.D San Leonardo Çittæ d’Impëia a vanta delongo e poxiçioin ciù erte da Serie A. À fronte de pöche vittöie do ballon ciù avvoxou, fòscia o Ponente o peu vantâse de ëse campion inte un spòrt da-a tradiçion ben ben antiga, vea eçellensa ligure.

Sanmargaiteise

Uña de squaddre de amatoî ciù antighe do Tigullio, a zeuga into stadio «Eugenio Broccardi» de Santa Margaita. I margaitin se son scriti pe-a primma vòtta a-a FIGC do 1920, in occaxon da partia de l’Italia contra i Paixi Basci zugâ à Zena; da chì a deçixon de piggiâ i coî bleu e çetron. A squaddra a l’é stæta inta serie C pe-a saxon do 1946-1947, e a l’à guägn fiña a Coppa Italia di amatoî da Liguria pe-a saxon 2013-2014, con fâ vedde comme squaddre d’amatoî peuan portâse apreuvo un carrego de stöia sportiva ben ben importante.

Sanremmeise

A Sanremmeise a l’é stæta inandiâ do 1906 e a pòrta into seu palmares unna Coppa Italia Dilettanti e unna famosa militansa inta serie B inta saxon 1937-1938. Con ben quattro refondaçioin ben ben reçente a squaddra a l’à alternou fase da amatoa e fase profescionistiche pe atterrâ inta Serie D. A squaddra do Petisso – a mascòtte da Sanremeise – a l’à zugou into stadio communale de Sanremmo da-o 1932 e a l’à delongo mantegnuo i seu coî gianco-bleuçê.

Sestreise

A Fratellanza Sportiva Sestrese Calcio 1919, ò Sestreise, a l’é un pö missa in ombra da-e doe squaddre ciù importante da çittæ. A squaddra a nasce primma de l’inseimento de Sestri drento a Grande Zena do 1926. Co-o zugâ into staddio Piccardo de Bòrzoi, a Verdestellâ a l’à visto a Serie B apreuvo a-a fin da guæra pe unna saxon, pe dapeu giaminâ pe mantegnîse inte Serie C. A-o momento a l’arresta inta Promoçion ligure sotta o nomme offiçiale de G.D.S. Sestrese Bor. 1919, con çercâ de portâ erto o scimbolo de st’antiga squaddra zeneise.

Sestri

L’Union Sportiva Sestri Levante, acciammâ pe commun o Sestri ò l’Union, a l’é unn’atra squaddra ligure ch’a pòrta i coî rosso-bleu comme o Zena ò o Voæ. A l’é caratterizzâ da-o Corsâ, o scimbòlico möo in sciô scuo ch’o dà o nomme a-i seu zugoei, i corsæ. A seu origine a l’é assæ romantica, fondâ o sabbo do Dënâ do 1919 in sciâ ciazza do Gorfo do Scilençio de Sestri Levante, pe inspiaçion da unna nuvia bleu investia da-o rosso do chinâ do sô. Inta saxon 2025 i Corsæ i se battan pe restâ inta Serie C tanto che i seu avversäi stòrichi, l’Entella, çercan de guägnâse a categoria pe montâ torna in Serie B. A squaddra a zeuga torna into stadio «Gioxeppe Sivori» apreuvo a-a fin di travaggi pe mette à giorno o campo à caxon da seu promoçion inta Serie C do 2022.

Spezza

«Dagghe Spezza!», un crio d’orgheuggio ch’o l’unisce tutta a provinsa de Spezza. E aquile do Alberto Picco da-o 1906, con træ refondaçioin (l’urtima do 2008), an guägno ben trei titoli e quattro trofëi naçionali. A-o momento en inta lòtta pe guägnâse torna un pòsto inta serie A sensa cuâse tròppo de tutte e desfie manageriale di urtimi dexe anni. Unna nòtta: o Spezza, co-o nomme de VV.FF. Spezia o l’à guägno à sorpreisa o scuo do 1944 con batte o grande Turin, ma a vittöia a no l’é stæta reconosciua pe caxon da guæra e de tante costoin politiche e amministrative, donca questo o l’é arrestou un titolo onorifico pe-a squaddra.

Spezziña

A Cestistica Spezziña a l’é avvoxâ inta pallacanestro femeniña e fondâ do 1969. A s’attreuva còmmoda inta serie A2 con unna Coppa Italia A2 into seu palmares. I coî arregòrdan quelli da squaddra de ballon da çittæ e a-o momento a zeuga drento a-o PalaMariotti de Spezza.

Voæ

O Voæ, ò Vado F.C., a l’é a squaddra ciù importante da çittæ co-o mæximo nomme, avvoxâ pe avei guägno a primma ediçion da Coppa Italia do 1922. Stæta inandiâ do 1913, con unna picciña interruçion pe-i anni 1940-1945 pe de raxoin econòmiche, o Voæ a-a giornâ d’ancheu o milita inta meitæ erta da Serie D e o va avanti à zugâ into stadio «Ferruccio Chittolina» dito coscì in önô do portê ch’o l’aiva perso a vitta inta partia contra l’Altareise di 7 d’arvî do 1946. O Voæ o pòrta i coî rosso-bleu, cobbia deuviâ de spesso da-e squaddre pionê do ballon italian. O Voæ o l’é un ponto de referensa pe-o ballon do ponente ligure, de spesso misso in ombra da-e squaddre «zeneixi».

Zena

Sta squaddra a no l’à ciù guägno un scuo che l’é çent’anni, a l’à patio anni de Serie B e de lòtte pe scampâ inta Serie A, pe no parlâ di anni passæ inta Serie C pe ciù motivaçioin. Ascì o Zena, battezzou pe tempi Genoa Cricket and Football Club, o l’arresta o club ciù antigo d’Italia ancon attivo, o quarto pòsto pe numero de scui con tutto che o no ne guägna da-o 1924, e o representa l’Italia into club di pionê do ballon mondiale. I griffoin no son solo che unna referensa into mondo do ballon, ma a seu existensa a l’é vegnua parte de l’identitæ zeneise e ligure a-a mæxima mainea da Sandöia, coscì comme o l’é o seu staddio de Marasci. I seu tifoxi con tutto che a squaddra a l’à patio reçenti scangiamenti de gestion n’an mai perso a speransa de vedde a stella do deximo scuo in sciâ maggia da seu squaddra.